政情：英祿唔得閒見他信
泰國總理英祿·西那瓦尋日嚟咗香港，進行為期兩日嘅官式訪問。佢除咗會同特首梁振英（CY）見面之外，亦會見各界人士。由於我哋經常都影到英祿嘅哥哥他信喺香港飲茶購物，諗到英祿或者會同流亡海外嘅哥哥喺香港會面。點知英祿就話到明，喺香港期間佢好忙，唔會同哥哥見面喎。
英祿同囝囝先去咗南韓，參加南韓首個女總統朴槿惠嘅就職典禮，之後就嚟咗香港。有外國報章見到我哋嘅報道，提到兩兄妹可能喺香港見面，於是直接去問英祿，英祿親口回答，話喺香港兩日都好忙，唔會見他信嘞。英祿國事為重，家事放埋一邊，不過兩人唔把握機會喺香港碰碰頭，真係有啲可惜。
今晚啟程返泰國
原來英祿喺短短兩日嘅香港之旅，活動排得密麻麻，首先要去禮賓府同CY進行雙邊會談，雙方就經濟同貿易兩方面嘅範疇簽署協議。除此之外，英祿仲要同香港嘅銀行家、旅遊業界等見吓面、交流吓，今晚就要返去泰國喇，行程可以話係十分緊湊。
咁趕，原來曼谷下個月舉行市長選舉，英祿趕住返去主持大局。