政情：劉燕卿忙覓人才
去年過檔聯合國出任消費者保障國際顧問專家小組主席嘅消費者委員會前總幹事劉燕卿（Connie），日前以一身紅色「利是封」打扮現身春茗活動，佢透露上任後首個遇到嘅難題，係要喺世界各地物色十二個專家，共商修訂保障消費者指引。啱啱喺外地公幹回港嘅Connie，預告未來工作一籮籮，下月分別要到內地及杜拜開會，睇嚟佢都要習慣做「空中飛人」喇。
職位嚴謹 未湊夠腳
Connie話，雖然世界咁大，但請「一打」專家並非易事，因為職位要求頗為嚴謹，要喺消費、法例、全球經濟發展等範疇有一定認識，依家暫時只請到來自英國、美國、日本、巴西、馬來西亞幾位專家，仲需要繼續努力。
Connie都有留意農曆新年期間旅客瞓旅遊巴嘅事件，直斥有關旅行社嚴重影響本港旅遊業形象，希望業界恪守誠信，避免再發生同類事件。