政情：劉江華密實封口
民建聯尋日舉行工商專業新春酒會，曾任民建聯副主席、去年底「出家」做官嘅政制及內地事務局副局長劉江華亦第一次返「娘家」出席公開活動，多位黨友見到出爐副局都好興奮，爭住同昔日戰友寒暄幾句兼交換新卡片，黨中央委員蔡素玉亦唔執輸，趨前向劉副局交換卡片兼問候，劉江華舊年喺立法會選舉大熱倒灶，一個轉身就榮升副局光宗耀祖，唔怪得黨友咁撐佢。
但劉江華榮升副局後唔知係咪近得政府多，連講嘢都官腔十足，好似記者問佢幾時約見提出「佔領中環」嘅港大法律系副教授戴耀廷同預計會傾啲咩，劉江華都支吾以對，只透露「咩都傾吓啦」，就連早前約見過咩學者討論本港政制發展都無可奉告，把口撬極都唔開。
蔡素玉免卻應酬煩惱
至於蔡素玉就輕鬆得多，連任港區全國人大代表嘅佢即將上京召開兩會，佢大讚中央新領導層高唱「反腐簡約」做得好透徹，皆因佢往年上京應酬好多，改革後慳錢、慳時間，更有多啲時間做自己嘢添！