政情：行會四子『收監』防洩密
行政會議成員可以接觸到大量機密資料，自從舊年林奮強被爆涉嫌偷步賣樓後，其他行會成員見過鬼都怕黑，總之做足利益申報，好似政府上周再推樓市六辣招，臨時臨急喺星期五召開特別行政會議，我哋聽聞只係申報利益，已經用咗十五分鐘，而且最少有四名成員包括史美倫、李國章、張學明同林健鋒，因有利益衝突關係需要避席，最後四人就要喺另一間房呆坐三粒鐘，同外界斷絕所有通訊，等到會議完畢至「放監」。
今次特別行會嘅保密功夫做得好足，事前傳出只會傾打擊走私奶粉措施，原來奶粉只係其中一個議程，用嚟做煙幕，真正大件事係傾打擊樓價嘅新辣招，聽聞一眾行會成員都要去到開會嗰一刻，至知原來係傾新辣招。除咗保密功夫做得好，連利益申報都做到加零一，講明行會成員只要有間接利益，都一律唔可以參與討論，要即時避席。
所以有四人唔止申報利益，仲乖乖避席以免被批評輸送利益，佢哋就係家族做地產生意嘅史美倫、身兼九倉董事嘅李國章、建築公司新昌非執董嘅林健鋒，同埋擁有大量新界土地同埋手持唔少物業投資公司嘅張學明。聽講四人被困於一室成三個鐘頭，只能夠睇吓報紙同互相傾偈，如果要打電話都得，但要叫行會秘書代打，自己唔可以掂部電話，以防機密資料外洩。至於百足咁多爪嘅陳智思理應都要避席，但由於佢嗰日無去到開會，咁啱避過唔使呆坐。
個個「繳械」 開會成員亦留堂
不過好笑嘅地方係，我哋聽聞去年行會討論雙辣招時，都有叫涉嫌利益衝突嘅行會成員避席，但上次個個懶理，照坐喺度開會，反而今次就有四人乖乖避席，睇嚟都係受到林奮強事件影響。咁唔使避席嘅行會成員又點呢？行會成員葉劉淑儀話，大家嘅手提電話都唔可以跟身，開會前要一一「繳械」，總之係未去到開會張枱，都唔會睇到份文件，葉太仲話就算開完會都未走得，因為當時財爺曾俊華未對外公布措施，佢哋惟有齊齊「留堂」，直至財爺開完記者會至可以散水，好彩行會秘書處都有人情味，喺大家留堂時提供三文治同墨魚丸等小食，等大家悶親都唔會餓親，算係體貼啦。