中環出更：朱曦包場睇戲撐李安
奧斯卡得獎名單昨日揭盅，來自台灣嘅知名導演李安執導嘅《少年PI的奇幻漂流》勇奪大獎。頒獎前夕，台北經濟文化辦事處處長朱曦及港澳台灣慈善基金會主席錢立祐，特登喺戲院包場睇戲助陣，仲率領台灣幫叫口號為李安加油，好有氣勢。
台灣場景拍攝 住足十個月
唔講唔知，呢齣戲有八成場景係喺台灣拍攝及製作，包括喺台中舊水湳機場特別搭建嘅「造浪池」，成為男主角漂流大海嘅主要片場，仲有台北木柵動物園、墾丁沙灘及屏東滿州嘅白榕園等，十足台灣製作。朱曦話，李安率領嘅攝製隊來自全球廿四個國家，共有一百五十人咁多，佢哋喺台灣住咗十個月，唔止加深咗對台灣嘅了解，仲對當地嘅電影製作技術讚不絕口！
錢立祐講起基金會未來動向，預告將去寧夏參加受佢哋資助嘅學生畢業禮。