中環出更：預言蛇年是非多 曾主席扮先知
立法會尋日舉行蛇年新春午宴，宴請特首梁振英、行政會議成員同一眾政府高官。話晒都係新正頭，作為主人家嘅立法會主席曾鈺成梗係要同大家打個招呼，講啲好意頭嘅說話啦。曾鈺成見到採訪午宴嘅傳媒朋友，就同大家講蛇年是非多，有是非即係有料寫，啱晒傳媒咁話，莫非佢係先知？
曾鈺成除咗忽然扮先知，預言蛇年是非多之外，佢致詞時就話，今年係蛇年，本來想講啲同蛇有關嘅祝賀語，不過就搵嚟搵去都搵唔到，唔係虎頭蛇尾、蛇蠍心腸、就係蛇鼠一窩、龍蛇混雜。曾鈺成又發現，除咗中國人對蛇冇咩好感，西方文化原來都一樣。好似伊索寓言就有農夫同蛇嘅故事，比喻恩將仇報，《聖經》故事都係講蛇引誘夏娃令人類墮落。
不過曾鈺成就覺得蛇都唔係唔好嘅，佢解釋︰「如果冇蛇嘅話夏娃同亞當就淨係望吓望吓、無所事事、衫都唔着，幾冇趣呢？有蛇先有是非，冇是非嘅話會好悶，傳媒又冇嘢做。」所以中國人將蛇列入十二生肖都係一種智慧喎。
焗接「你呃人」咕o臣
立法會議員就同高官玩遊戲，根據官員同議員嘅官方照片同陳年生活照講出相中人嘅姓名、職銜或代表界別。議員隊代表有湯家驊帶吳亮星、梁志祥兩位新丁，官員隊就有食物及衞生局局長高永文、商務及經濟發展局局長蘇錦樑同行會成員史美倫應戰，結果官員以一分險勝。真係唔知係班議員水皮，定係班官員知名度低喇。
玩完遊戲後，台下繼續上演長毛梁國雄送「你呃人」咕o臣畀梁振英，結果長毛畀現場保安拉走，臨走前，佢將咕o臣塞咗畀曾鈺成。
卓妮