十年河東，十年河西，十年人事幾番新，十年生死兩茫茫……十年，人生有幾多個十年？
大家可能會問，功夫茶今日因乜事幹好似有少少傷感？冇錯，功夫茶確係百感交集得心有慼慼然，事關○三年奪命無數嘅沙士瘟疫眨下眼已經春去秋來十個寒暑，點不知一個屈尾十又整多一個殺傷力更大嘅新沙士病毒，真係唔得佢死呀，老友！
十載穹蒼斗轉星移，前前後後已經出現過三個特首，變來變去似乎有一件事始終不變，就係港產官僚硬係後知後覺，冇做好防疫應有嘅把關工作。嗱，新沙士來勢洶洶，由中東開始發病以來已經蔓延至英國嘞，至今全球累積十三宗感染個案，其中七人返魂無術，死亡率超過百分之五十高到得人驚，試問特區政府有冇嚴陣以待呢？請恕功夫茶眼拙，真係睇唔到囉。
瑞士醫學研究指出，新沙士病毒經肺氣管入侵人類免疫系統，速度比起十年前嘅老前輩快一倍，兩日就造成極大破壞，世界衞生組織呼籲全球嚴密防範新沙士病毒傳播，香港有乜嘢反應呀？唔好唔記得，除咗新沙士有疫情擴散嘅迹象之外，內地貴州亦爆發奪命禽流感，一個唔覺意又係交叉感染人傳人。新沙士加上禽流感，船頭有鬼，船尾有賊，可以話係「雙疫齊飛」，請問醫療官老爺有冇提高警覺呀？對唔住，出入境口岸唔見特別戒備，醫院重地連消毒地氈都唔見，真係令人擔心防疫陣線不堪一擊o架。
「東方報業民意調查」顯示，大部分受訪者感到憂慮，四成一認為香港難以獨善其身；兩成七擔心病毒傳染速度快，防不勝防；兩成一憂慮疫症全球蔓延。既然香港係國際交通樞紐，三成九受訪者就覺得嘞，新沙士容易透過旅客傳入香港；三成六促請政府加強機場疫症監察機制；一成七認為香港屬於高危地區，隨時被疫症攻陷。
簡單咁講，唔止功夫茶見唔到官老爺提高警覺，普羅大眾亦唔認同衞生官僚掉以輕心。四成二受訪者認為政府應該提升戒備級別；兩成八批評當局冇吸取十年前嘅沙士教訓；兩成一直斥形勢已經岌岌可危，政府仍然坐以待斃。
好一句坐以待斃，十年前香港死咗二百九十九人，慘痛經歷記憶猶新，唔通真係要再一次「癡癡呆呆、坐埋一枱」？想當年醫療界一哥楊永強講完「社區冇爆發」之後一發不可收拾，功夫茶打死都唔想歷史重演囉。
現時為醫療界當家作主嘅係食衞局局長高永文，功夫茶贈佢九個字：起身啦，咪瞓喇，打仗呀！