近排喺網上流傳一份由「香城宣傳及洗腦局」出版嘅「香城中學文憑考試」卷五綜合能力考核試卷，試卷版面像真度極高。
試卷要求考生喺限時為「愛護香城力量」發言人「陳一心」撰寫一篇宣傳講稿，呼籲市民出席支持香城行政首長「梁英秀」，同時用「文革方式」批鬥社民連「梁向華」議員。一篇講稿要收一石二鳥之效，難度都唔低，好彩「洗腦局」準備咗一啲背景資料，又整埋一段聲帶畀考生親耳體會「關你×事」嘅精髓，聲帶內仲有一首搖滾綠袖子，包你一路睇資料一路搖擺。青年應懂得獨立思考，份假試卷咪當用嚟鍛煉吓考生嘅腦袋囉。