政情：廢腑之言：搵長毛唔使去老蘭

政府早排喺施政報告提出加強取締濫用公屋嘅富戶，房屋署年初更向社民連立法會議員梁國雄（長毛）「開刀」，審查佢嘅入息及資產係咪仲合乎資格上限，雖然長毛最終成功過關，但亦逃唔過同行嘅狙擊。金融界議員吳亮星日前喺立法會大會上，暗嘲部分月入七、八萬元嘅市民都霸住公屋賴死唔走，更有議員揶揄部分人成日落蘭桂坊兼揸靚車仲住公屋，似乎意有所指。

火滾發爛渣

無端端成眾矢之的，長毛頓時無名火起，澄清自己「一年去蘭桂坊五次都冇」，部車亦係畀社民連作日常之用，自己平時出入都要靠公共交通工具代步咁話，所以大家亦唔使再喺蘭桂坊尋找長毛嘅蹤迹喇。長毛平時最叻笑笑口四両撥千斤，今次咁火滾，可見佢畀人屈得幾緊要。（周依露攝）

第一手消息請下載on.cc東方互動iPhone/iPad/Android/Windows Phone Apps