港府打擊炒樓嘅成績雖然未見成效，但決心就毋庸置疑，財政司司長曾俊華去年十月出雙辣招未夠半年，就要再推出六辣招，包括全面提高印花稅同下調按揭成數。不過外界對新辣招嘅反應麻麻，一般分析認為加大印花稅能令炒家絕迹豪宅市場，但資金只會轉移流向細價樓，最終都係谷高晒啲細價樓嘅價位。
非常時期用非常手段，的確係無錯嘅，但曾俊華一味推出辣招，只能夠壓抑需求，唔代表令市民買到樓，呢種做法就好似一個廚師煮嘢食只得一種味，試問咁搞法又點會好食呢？大家唔好忘記，財爺上星期講得好清楚，話如果新辣招仲未收效，唔排除會再加辣o架，最終會唔會辣死人，到時就知。
