市民置業難，政府就話唔係唔想增加供應，不過增加供應都要先搵地起樓。工聯會陳婉嫻見梁振英政府全民覓地咁辛苦，前排就拉埋學者同文化界人士組成「天橋底行動」，希望將政府視線轉至天橋底，建議政府只要喺天橋底放番幾個貨櫃，咁天橋底都可以變身做臨屋區。當日嫻姐建議一出，即刻喺社會惹嚟唔少批評，話佢涼薄要人瞓天橋底，點知連發展局局長陳茂波（Paul）都好似唔多領情，尋日喺網誌問：「齊齊去瞓天橋底？」
Paul尋日喺網誌撰文話，雖然政府覓地建屋過程唔容易，但亦唔會為求達到建屋目標，而忽略土地係咪合適，計劃係咪實際可行，局方喺改變土地規劃時亦會考慮一系列相關因素，務求唔會為社區帶來負面影響。
Paul唔否認天橋底用地可多加善用，例如香港建築中心就正向政府申請喺上環干諾道中天橋底興建總部，有關申請有待地政總署審批。不過Paul又話，政府喺規劃天橋底嘅時候亦需依從《香港規劃標準與準則》規定，例如熟食檔、住宿、日間護理服務中心等，都唔可以用天橋底o架。