政情：大學時搞論壇 陳恒鑌當年唔識劉江華
政圈中人嘅關係，好多時都係盤根錯節，唔講都無人信。好似民建聯立法會議員陳恒鑌（阿Ben）咁，佢自爆讀大學嗰陣已經同現時貴為副局嘅劉江華交手，話說佢當年幫時事學會搞咗個論壇，民主派有劉慧卿坐鎮，點知建制派只得劉江華一人應戰，當時做搞手嘅阿Ben話自己根本唔識邊個係劉江華，但見識過佢嘅辯才後，先知自己有眼不識泰山。
被其辯才折服
阿Ben話，回想九十年代喺科大讀機械工程嘅時候，自己已對政治有濃厚興趣，所以一心諗住搞場星級政治人物論壇，提高其他同學對時事嘅認識，發邀請信時以為建制派會派出曾鈺成等政壇老手，估唔到最後竟派出一個劉江華，搞到阿Ben無晒癮，因為佢當年未聽過劉江華呢個名。
阿Ben話當年劉江華未加入民建聯，無咩人識，但劉江華一開口後，佢先發覺自己唔識嘢，即時被劉江華雄辯滔滔嘅口才吸引到。其實當年劉江華以公民力量身份，已經雄霸沙田，唔算無名小卒o架喇。不過阿Ben唔使咁介懷嘅，劉江華都估唔到自己輸咗選舉，可以做到副局長啦，世事又點會咁易畀你估到呢。