政情：局長議員訪韓睇人倒垃圾
推行源頭減廢係新政府首要目標之一，環境局局長黃錦星上任未夠八個月，先後就垃圾徵費同玻璃樽生產徵費展開諮詢。為咗參考其他國家嘅減廢經驗，環境局決定同立法會環境事務委員會攜手合作，四月頭去南韓首爾考察四日，了解當地管理廢物嘅經驗。議員出國考察周不時畀人質疑係想用公帑旅遊，但黃局長為咗令今次嘅首爾之行更有意義，除咗要求將四日行程安排得密密麻麻之餘，仲下令要啲議員早啲起身，睇吓平時首爾居民倒垃圾嘅情況，睇嚟今次考察冇以前咁輕鬆嘞。
議員高官行程幾一樣
立法會每屆都會以考察外地立法機關為名頻頻派代表團出埠，不過呢啲代表團可謂養尊處優，行程包保唔辛苦不特止，返港後仲淨係靠秘書處出新聞稿同整份廿幾頁嘅報告就算。環境事務委員會今日將會討論四月嘅首爾之行，平時議員出國考察都冇乜特別，不過今次嘅特別之處就係局長黃錦星連同一眾環境局官員都有份去考察。據了解，立法會同環境局嘅考察行程幾乎一樣，不過環境事務委員會嘅委員，先比環境局官員早一日飛去首爾，見吓當地市議會代表同民間團體，初步了解當地廢物處理情況。
清晨六點鐘拉隊觀摩
而當環境局班子抵達首爾後，一班官員同立法會議員就會齊齊參與南韓環境局為佢哋舉辦嘅簡介座談會，認識南韓嘅減廢心得同挑戰。第二日朝早六點幾鐘，黃錦星就會率領一眾議員觀摩首爾居民倒垃圾嘅情況，順便考察住宅同商業樓宇嘅廚餘收集情況。之後議員們會走訪首爾市市內，睇吓回收箱及垃圾箱嘅擺放同設計，最後仲會參觀首爾市中心內嘅堆填區同焚化設施。
委員會主席何秀蘭（Cyd）透露，為咗嚴格遵守立法會外訪規定，所有議員搭飛機都要坐經濟客位，而住宿方面就會盡量安排同環境局住喺同一間酒店。阿Cyd又歡迎政府官員同立法會議員一齊出國外訪，話行政同立法機構喺同一個基礎上睇減廢回收，喺委員會討論議題時唔會雞同鴨講之餘，達成共識都會快得多喎。