中環出更：媽打籌款 局長滿場飛
民政事務局前常秘、人稱「媽打」嘅李麗娟係瑪利諾修院學校嘅超級校友，每次為學校籌款都超額完成。趁昨日元宵佳節，媽打又出錢出力，聯同舊生會及學校嘅教育基金，喺中學部舉行珍寶滿盆宴，筵開五十圍，籌得六十萬元。
在母校辦盆菜宴
主禮嘉賓係食物及衞生局局長高永文，主家席陣容鼎盛，細個做過瑪利諾女校男生嘅「金刀梁」梁智鴻醫生帶埋太太嚟食盆菜，仲打趣話想借太太條裙嚟着，不過着唔落。梁太馮令儀第一次嚟到瑪利諾，大讚呢個被列為法定古蹟、古意盎然嘅校園好正！瑪利諾今年八十八歲，席上知名校友仲包括現時小學部校監余黎青萍、前立法會議員劉健儀等。
民望最高果然名不虛傳，帶埋太太出席的高永文醫生滿場飛，佢四圍巡時相當搞笑，不忘盡局長職責，提醒大家盆菜要徹底翻熱至可以食。
媽打未退休前已與高醫生工作上相當合拍，兩人雙雙離開政府後，依然友誼不減。一般人都係稱高永文「醫生」、「局長」，工作拍檔就叫聲「阿高」。媽打特別親暱，叫「永文」。佢一嗌，永文立即過去與媽打和老友一同合照。