中環出更：董吳玲玲收獎金 寧買翡翠唔買樓
政府加辣壓抑炒風，嚇到炒家雞飛狗走。手揸唔少「磚頭」嘅名人就話唔急於賣樓套現。但憂慮辣招陸續有來，故名人都「睇定啲」先入市。其中人稱「翡翠王后」嘅前仁濟主席董吳玲玲，就寧願買翡翠都唔買樓。
董太匹愛駒「翡翠明星」尋日以大熱姿態出戰第一場，最後跑第三，袋八萬元獎金。新正頭開齋發財，董太話心滿意足。
「政壇富婆」唔急賣樓
講番樓市去向，董太認為降溫係好事：「商舖、住宅炒到癲價，想喺中環搵間快餐店食飯都難。」係咪掃得貨？董太就擰頭，佢話年內都唔會貿然入市，有閒錢，寧願買優質翡翠，因為貨源稀少，好似佢手上嗰隻鈪價值兩百萬元，有錢都未必買到。
「政壇富婆」張永珍都趁新春入場沾吓旺氣，投資古董有道嘅佢，自爆手上有幾層樓收租，就算政府出招，都唔急賣樓，亦唔驚樓市會冧喎。
尋日亦係元宵佳節，保良局副主席鄭錦鐘同太太拍拖入場慶祝吓，身為深水埗區議員的兒子鄭泳舜因不愛賽馬，晨早五點同班區議員老友參加馬拉松十公里賽事，唔使一粒鐘就跑畢全程。成績咁好，一於獻畀太太做元宵節禮物，認真浪漫。
卓妮