唔通真係噩夢重臨？十年前，沙士疫潮爆發，香港經歷一場浩劫；十年後，新沙士兵臨城下，香港會唔會又變疫埠㗎？
功夫茶唔係杞人憂天，事關新沙士來勢洶洶，繼日前英國出現首宗人傳人死亡個案之後，陸續又有人中招，尋日沙特阿拉伯向世界衞生組織通報一宗確診新型冠狀病毒感染死亡個案，令新沙士死亡人數增至七人，死亡率超過五成，你都咪話唔得人驚。更得人驚嘅係，呢宗個案喺死後八日至被確診染上新沙士，世衞擔心有更多潛伏個案，甚至好似十年前嘅沙士一樣持續擴散，呼籲各國緊密監察病毒情況，包括為疑似受感染病人進行測試。
新沙士疫情告急，全球拉響警號，港府又有乜反應呢？食衞局局長高永文話喎，香港已經從十年前血的教訓中吸取經驗，增撥資源加強抗疫能力，如果疫情重現嘅話，唔排除採取超前措施，杜絕疫症蔓延。佢仲煞有介事提醒市民保持警覺，叫大家唔好鬆懈喎。
港府真係吸取咗教訓？真係加強咗抗疫能力？望係咁望啦，可惜事實唔係咁。呢嗱，本報記者直擊多個出入境口岸，發現防疫零設防，體溫檢測儀畀人拆走晒，檢疫櫃位擺空城計，提醒遊客防範新沙士嘅宣傳單張更加付之闕如……病毒無疆界，邊境口岸居然中門大開，咪即係歡迎病毒入侵？
口岸不設防，公立醫院一樣防線鬆懈嘅咋，除咗傳染病中心變咗無掩雞籠，任人自出自入，醫護人員更加變咗病毒傳播黑手，離開醫院無洗手，出入亦無戴口罩。至於防疫設施咯喎，更加天殘地缺，唔係消毒液機無消毒液，就係門診門口無消毒地氈，咁樣叫加強抗疫，咁樣叫吸取教訓，咪玩啦！
喂，出入境口岸同公立醫院係抗疫第一、二道防線，家陣兩道防線雙雙棄守，中門大開等病毒攻佔，萬一新沙士大爆發，香港想唔變疫埠都幾難。當年就係因為港府輕忽大意，疏於防範，先至畀沙士長驅直入，結果造成一千七百幾人受感染，二百九十九人死亡，呢個沉痛教訓，官老爺仲記唔記得呀？好了瘡疤忘了痛，當局麻痹大意，疫情零設防，十年前嘅沙士噩夢隨時重演嘅咋。
十年前沙士一幕，市民歷歷在目，估唔到重現眼前嘅，唔止係世紀病毒驚世重臨，仲有港府疏於防範嘅恐怖場面。功夫茶想提醒港府，你哋可以忘記自己嘅錯失，但唔好忘記新沙士嘅風險比沙士有過之而無不及。正如港大微生物學系講座教授袁國勇話齋，新沙士傳染速度快，死亡率超過五成，可以好大鑊！
十年生死兩茫茫，沙士教訓豈能忘。計功夫茶話齋，高永文提醒市民保持警覺固然重要，但最重要都係提醒港產官僚保持警覺，如果香港再次淪為疫埠，你哋謝罪落台都唔掂呀！