最近幾年嘅農曆新年，自由黨都會浩浩蕩蕩咁去中聯辦拜年，有時仲會發埋新聞稿自爆同對方傾咗乜，引起其他根正苗紅嘅建制派不滿，質疑自由黨以拜年為名，抽水為實。自由黨一行約廿人尋日又去咗中聯辦拜年，但係就疑似畀新任中聯辦主任張曉明訓話，叫自由黨多啲支持特首梁振英政府依法施政，又提醒該黨唔好只顧「兩制」，唔理「一國」，認真無面。
中聯辦今年一改過往分批同本地建制派拜年嘅做法，原定喺下周一與全體建制派議員「集體」拜年，有說此舉正係針對自由黨藉拜年抽水嘅行為。但其後張曉明突然有事要離港，集體拜年活動被迫取消，自由黨於是就喺尋日獨自到中聯辦拜年，並透過榮譽主席田北俊喺立法會「自爆」有關消息。
田北俊透露，張曉明喺會面中重申前日喺中聯辦新春酒會上嘅言論，呼籲自由黨支持特區政府施政，又提及依家香港社會上有唔少人關心「兩制」，但「一國」就冇乜人關心。任何聽慣中央官員講話嘅人，都意會到張曉明其實係暗批緊自由黨成日同港府對着幹，只顧「兩制」而唔理「一國」，但田少就一於好少理，強調該黨會「是其是，非其非」，繼續對一啲市民唔支持嘅政策喺立法會投反對票喎。