政情：鼠王芬馬恩國解畫
立法會經常都出現唇槍舌劍，好容易會禍從口出。立法會議員梁美芬（鼠王芬）星期三喺立法會就「落實雙普選」辯論時，因為提到「出動解放軍」言論而備受抨擊；而本身係大律師嘅民建聯司法及法律事務副發言人馬恩國亦都因為喺立法會會議上爆粗而被大律師公會調查。鼠王芬同馬恩國尋日就為自己嘅惹火言論解畫。
一個卸畀人 一個認衰
鼠王芬尋日就喺社交網站上發貼，話佢嘅「出動解放軍」論只係引述港大法律系副教授戴耀廷喺周刊上嘅講法，唔係佢本人提出，又話自己係十分尊重港人嘅遊行示威權利，佢只係希望泛民主派可以聆聽唔同聲音，停止「癱瘓警署」、「癱瘓中環」等危險呼籲咁話。
至於喺立法會爆粗而被大律師公會紀律審裁組調查嘅馬恩國，尋日亦都承認自己當日喺立法會嘅言論用字不當，又話自己係因為憤怒先至衝口而出，如果因為咁而破壞咗大律師公會喺公眾眼中嘅地位，佢謹此致歉。馬恩國仲話，大律師公會已經接手處理事件，佢唔會再回應。兩人都分別解畫，公眾點睇就要留意事態發展喇。