政情：李惠利外孫「捍衞」地皮
九龍塘李惠利工業學院用地究竟係咪應該起豪宅，定係全幅地畀浸會大學起中醫教學醫院，至今仍爭拗不休，如果當年捐出巨款起學校嘅大慈善家李惠利仲喺度，唔知佢會點睇件事呢？雖然佢老人家再冇可能現身表達意見，但佢嘅外孫兼香港鐘錶業總會副主席高鼎國（Geoffrey）就話，當年公公捐建學校目的係支持香港工業，所以地皮好應該留番畀工業界使用。
Geoffrey前晚出席電鍍業商會周年活動時，一講起九龍塘李惠利工業學院用地爭拗就有感而發，話公公李惠利係香港第一代工業家，為咗培養香港設計人才，三十六年前豪捐五百萬元興建李惠利工業學院，呢筆錢依家睇嚟濕濕碎，但當年足以買起灣仔成條街喇！後來李惠利學校成為香港設計人才嘅搖籃，為香港今時今日引以自豪嘅「設計之都」貢獻良多。
政府被爆曾承諾唔起豪宅
雖然政府已經以一換一嘅形式，用調景嶺地皮換取九龍塘用地，並將學校搬到調景嶺，但曾經跟隨公公身邊多年嘅Geoffrey話，政府唔應該不斷攞走工業界資源，佢認為九龍塘幅地皮唔應該起豪宅，亦唔支持起中醫教學醫院，而係將塊地留番畀工業界發展。另有工業界老行尊爆料話，當年政府用調景嶺地皮換取九龍塘用地，曾承諾將九龍塘地皮用番喺教育用途，並非用作興建豪宅，否則佢哋就唔會同意換地。
不過，喺目前土地短缺嘅形勢下，睇嚟政府或會一意孤行將土地撥作興建豪宅，而揚言爭地失敗就會請辭嘅浸大校長陳新滋，可能要執定包袱。
Geoffrey話鋒一轉話，歐債危機令歐洲經濟一落千丈，但係點解德國打不死？原因就係德國嘅工業佔整體境內生產總值（GDP）比重高達百分之廿五，反觀香港工業只佔GDP百分之七，佢好肉緊警告話，如果香港再唔發展實體經濟，只係一味依賴金融、零售等服務業，遲早玩完喎。唔知Geoffrey嘅意見會否令有關地皮爭奪戰更加白熱化呢？