中環出更：吳傑莊試紅色跑鞋即買
將於聽日舉行嘅馬拉松賽事，唔少名人都有報名，好似金至尊數碼行政總裁吳傑莊（Johnny）都有組隊參賽，與十幾位來自工程科技學會（香港分會）嘅好友齊齊鬥長氣。為咗隆重其事，Johnny日前仲特登買對加厚氣墊嘅新跑鞋，但用新跑鞋跑馬拉松係咪合適呢？
領軍出戰馬拉松
卓妮周二朝早十一點幾鐘行經一個商場，遇見Johnny喺一間體育用品店內試鞋，見佢一身運動裝，似乎係啱啱練完跑步。貨架上鞋款琳瑯滿目，揀邊對至啱？Johnny「掃射」幾秒後，眼球被一對紅色氣墊跑鞋吸引，毫不猶豫坐低慢慢試，佢見着得好舒服，於是扑錘花一千多元購買，用嚟周日跑馬拉松。
數家中運動鞋，Johnny話有十幾對，有齊籃球鞋、足球鞋、跑鞋，統統揀鮮艷顏色，事關着起嚟特別開心喎。今次佢將以學會委員身份領軍，旨在慶祝學會廿五周年紀念，隊友們仲印埋隊衫，士氣高昂。Johnny近日頻頻練跑強壯心肺功能，誓要跑出最佳成績。
卓妮