中環出更：官場簡約風 政商名人讚好
中港兩地肅貪、簡約風氣盛行，就連新官上場嘅中聯辦主任張曉明，前日都喺新春酒會上開宗明義話要「禁收禮」、「減少應酬」，一句講晒要「簡約」。此話一出，政商界名人都好認同，認為以往遍地花籃及送禮情景，確係浪費。查實內地官場貪風早為人詬病，肅貪辣招早就應該出，如今知錯能改，為時未晚。
尋日中華總商會春節酒會上，簡約同肅貪成為熱門話題，中總會長楊釗帶頭話「好Buy」呢套新文化，坦言官員拒受禮，對於老百姓來說，當然更受落。佢又話，香港商界一向守法，即使送禮畀特區政府官員，都有一條界線，唔會越界喎。不過，有人認為商界唔應該送禮畀官員，擔心送送吓禮又助長貪風。
羅范椒芬：風氣已有改變
講到簡約，前中總會長蔡冠深同行政會議成員羅范椒芬都話係好事，羅太指國家新領導人上場後，內地官場風氣明顯改變。佢坦言，以前去內地政府大樓都見到有大果籃，開政協會議期間亦都會收到小禮物，但早前省級政協開會，風氣已變得好簡約。
同場嘅中聯辦副主任殷曉靜都話，會按主任張曉明嘅要求去做，但坦言以往都有「唔收禮」嘅要求，只係張曉明重申呢個要求啫。卓妮之後又喺中華廠商聯合會新春團拜見到會長施榮懷，佢話稍後上京開政協會議期間，已預期會減少飯局，改為集中精力去開會喎。
卓妮