世通假期，零舍離奇，最離奇嘅莫過於喺人頭湧湧嘅旅遊旺季，居然冇為客人預訂酒店房間。於是乎，世通假期接待嘅旅行團變成人在旅途灑淚時，來自內地嘅遊客初到貴境無處容身，迫於無奈以旅遊巴士作為臨時客棧，上演一幕賺人熱淚嘅「落難遊客瞓巴士記」。
怠慢客人搞到咁鬼死肉酸，聲稱感到羞恥嘅旅遊業議會，梗係要世通假期好好交代啦。跟住落嚟離奇事件又出現，世通假期負責人王永堅以身體不適為理由，限期屆滿前都冇現身旅議會解釋。令人拍案驚奇嘅世通假期，只係發表聲明，就農曆年假期連串不愉快事件向受影響旅客及公眾致歉。世通又話，有關事件已交由律師處理喎。
理論上負責維持業界秩序嘅旅議會，又有乜嘢反應呢？旅議會認為世通假期違反章程，加上經營手法損害公眾利益，決定暫停佢嘅會籍，直到調查完成為止。旅議會總幹事董耀中指出，世通假期至今無法提供三份重要文件。至於旅議會主席胡兆英就話嘞，暫停會籍呢個決定係史無前例，會將專責小組嘅決定知會旅行代理商註冊處。
其實計功夫茶話齋，無良旅行社真係要小懲大戒o架，情況就好比專門劏客嘅黑店，當然要趕盡殺絕啦。再講得白啲吖，若然世通假期冥頑不靈，連解釋或者掩飾都懶，唔好講咁多嘞，一於釘牌啦！
嗱，係人都知旅遊業係香港其中一碌經濟支柱，源源不絕來港消費嘅遊客簡直就係財神到，你要佢哋瞓巴士點都講唔通啦。冇錯，香港嘅配套設施未必足夠，特區政府官老爺又冇全力支持開發更多酒店同旅館，不過正正因為空間有限，旅行社更加要做好訂房嘅準備吖嘛，冇可能臨急臨忙先至帶住鴨仔團去酒店Walk In博大霧。旅行社連咁基本嘅待客之道都做唔到，釘牌唔係好過分啫，吓話！
講開又講，政府究竟有冇諗過加強監管，以及增加旅遊業配套設施o架？類似瞓巴士嘅事件其實時有所聞，有遊客入住時鐘酒店，又有人去到荒山野嶺露營，雖然部分自由行遊客係自願嘅，並唔係無良旅行社夾硬要佢哋席天幕地，不過都間接反映香港嘅酒店房間真係捉襟見肘。喂，唔好唔記得喎，香港人對於遊客露營都好有意見，認為係一種侵佔資源嘅行為。你知啦，家陣嘅中港矛盾相當敏感o架，露營期間一聽到隔籬帳篷以普通話高談闊論，難免會殺風景兼傷感情o架。
點都好啦，麻煩旅議會秉公辦理，要嚴懲就嚴懲，要釘牌就釘牌，完全唔使客氣，確保香港唔會由美食天堂淪為旅遊地獄。