貪曾禍港七年，除了臭名遠播的「貪遍省港澳」；其次便是用人唯親，搞到官場烏煙瘴氣。貪曾用人唯親，經常違反程序正義，冇規冇矩。好明顯，湯顯明○九年已屆六十歲退休之齡，仍獲貪曾續約延任廉政專員三年，直到一二年六月底才與貪曾一起離開，可見兩人關係非比尋常。
講真，如果湯顯明真正是倡廉先鋒、打貪武松，冇人會懷疑貪曾有「私心」或不可告人之目的。可事實擺在眼前，湯顯明被揭發在任時未經正常公開招聘程序，以年薪近百萬元招聘內地學者出任廉政顧問，惹來學者及政界嘩然。阿哥，內地貪腐致領導人都要驚叫「亡黨亡國」，湯顯明卻偏偏睇中內地學者，難怪予人有用公帑收買內地人心之嫌，以為自己日後擔任政協而鋪路。
人以群分，物以類聚；上有所好，下有所效。真係一啲都冇錯。貪曾貪威識食，豪花公帑奢住總統套房，呢呢呢，這位貪曾特別賞識嘅湯顯明，在任廉署五年被翻舊帳，揭發「五宗罪」，期間多次外訪，其中一次率領六名廉署高層前往摩洛哥出席國際會議，乘搭商務客位連酒店等，十日行程豪花公帑五十九萬元。
坦白講，有市民向廉署舉報湯顯明涉嫌包庇貪曾，如果廉署連立案調查都唔做，咁就連清末京城流傳一句順口溜嘲笑「太醫院的藥方，翰林院的文章」也不如。所謂「太醫院的藥方」是指太醫院的御醫治療的都是皇帝、太后，用藥極大風險，眾多御醫聚在一起，綜合各人意見，最後處方多是「醫你唔好食你唔壞」；翰林們的文章雖洋洋灑灑，卻無關痛癢，徒具形式，沒有實用價值。
今廉署查貪曾，查了成年連屁也沒放一響；「掘出蘿蔔帶出泥」，湯顯明呢位曾朋友，涉嫌包庇也不立案跟進，比起太醫的藥方更不堪！咁搞法，廉署招牌想唔風雨飄搖都難矣！