早前傳出前政務司司長唐英年忽然出售一批心愛嘅紅酒珍藏，預計喺下月拍賣，估計最少套現三千萬元，隨即惹來好多揣測，除咗有人估計唐唐啲酒多到已經飲唔晒之外，尋日又傳出咗多一個原因。
據聞唐唐拍賣嗰批藏酒，原來已經有十幾年歷史，由當年未成熟至今，已經到達收藏時間限期嘅頂峰，如果唔能夠喺呢幾年飲晒，質素就會直線下降變差、變「醋」，變得唔值錢。
由於唐唐自稱藏酒飲幾世都飲唔晒，所以佢先急不及待拍賣批到期酒，一來唔使擺喺酒窖浪費，二來又可以益到紅酒愛好者。紅酒界仲有個傳言，唐唐能夠飲一啖酒就知支酒喺邊度出產，用咩提子，甚至年份都飲得出，其實同品酒經驗豐富有好大關係。
據聞唐唐同多個愛酒富豪搞咗個「品酒會」，呢個品酒會共有八名神秘成員，個幾月就會有一次聚會，每次都有唔同主題，例如有時係波爾多，有時係選擇特定嘅提子品種，總之每次聚會各人都會帶一支名酒去，即係每人可以一晚飲八種名酒。咁樣飲法，經驗日積月累，乜都飲得出啦！