政情：無練渣馬十公里 陳新滋怕跑輸沈祖堯
嚟緊禮拜日就係一年一度嘅渣打馬拉松，浸大校長陳新滋今年亦有報名參加十公里賽事，過往參賽過幾次嘅佢，本來應該無咩難度，但佢尋日同傳媒春茗時，就坦言今年好擔心，因為佢早前忙住處理爭取前李惠利學校地皮單嘢，無乜時間練習，如果只係輸畀其他有參賽嘅浸大師生就無所謂，最怕係跑得慢過同樣有參賽嘅中大校長沈祖堯，就對唔住全體浸大師生。
問佢驚唔驚少練習會跑到抽筋，陳新滋話都有啲擔心，但勝在浸大有一班識得推拿嘅學生喺終點守候，萬一有咩唔舒服，都可以搵佢哋幫手。
讚刮痧驅走傷風
陳校長講唔夠兩句，又開始向傳媒推銷浸大嘅中醫學技術，自爆早前患上傷風，經身兼中醫藥學院臨床部主任嘅協理副校長卞兆祥教授親自幫佢刮痧後，兩日之後佢即刻好番晒，非常有效。如果刮痧可以令人跑得快啲同埋耐啲嘅話，陳校長就唔使咁憂心喇！