政情：阿Paul 袋巾傑 玩殘曾主席

立法會辯論議案時，議員要先撳掣向秘書示意想發言，秘書處就會列出議員發言人數同次序，等其他人知道仲有幾多個議員等候發言。當所有有撳掣嘅議員發言完畢後，主席就會問在座議員：「仲有冇議員要發言？」如果冇議員舉手發言，主席就會宣布議員辯論時間完畢，跟住就畀官員作總結發言。不過，近來唔少議員都有個壞習慣，就係鬥遲發言或等到最後一刻先舉手話要發言，其中阿Paul同袋巾傑就鬥到出晒面。

睇住人哋點講 度橋反駁

阿Paul同袋巾傑對鬥遲發言一事直認不諱，袋巾傑話，依家辯論唔會寫晒成篇講稿，通常都會靜觀其變，睇吓人哋點講再度橋反駁，當中主要對手就係阿Paul。佢話如果自己太早講嘢，就唔可以駁斥阿Paul嘅發言喎。阿Paul就話自己鍾意等所有人發言完畢先要求發言，話咁做可以掌握唔同議員嘅睇法；又話袋巾傑有時發言都幾精彩，所以想聽埋對方講嘢先決定點回應喎。

不過，阿Paul就話呢個方法並非萬試萬靈，好似前日辯論贊唔贊成引用《權力及特權條例》調查全國政協委員劉夢熊嘅言論，因為代主席梁君彥最後只係問咗一次「仲有冇議員要發言？」就隨即宣布中止辯論環節，搞到佢舉唔切手冇得講嘢喎。正因為兩人經常鬥遲發言，搞到主席曾鈺成要特別(目及)實佢哋兩個，但試過忍無可忍下，就提醒佢哋發言前唔該早啲撳掣，唔好搞到臨尾先舉手要求發言。

當年今日 曾鈺成現眼報

不過，話說回來，其實曾鈺成未做主席前都經常同前支聯會主席司徒華鬥遲發言，有泛民議員仲曾經話曾鈺成係「秘密武器」，到依家反而要為議員鬥遲發言而煩惱，唔知呢啲係咪叫做「現眼報」呢？