政情：楊釗拜年兼幫田少開年
新春團拜同春茗接踵而來，尋日輪到中華總商會搞午宴，外號「牛仔褲大王」嘅中總會長楊釗、副會長方文雄（David）、常務會董陳南祿（Philip）齊現身拜年。對於日前商界立法會議員田北俊公開批評特首梁振英（CY）「冇料到」，又話商界同CY關係麻麻，楊釗就暗寸田少話：「牢騷發得多，對自己身體都冇好處！」又話商界批評政府嘅態度要善意、唔好有針對性，咁樣對雙方先有利。
楊釗話，香港既然已經選出CY做特首，大家就唔好再糾纏落去，「譬如話選咗我做會長，我都未做，你就話我唔得，好唔fair（公平）啫！」佢坦言，中總對CY首份施政報告好滿意，認為已經抓住施政大方向，希望大家公平啲，畀啲時間特首做嘢喎。
標準工時 支持討論
至於近日極具爭議嘅標準工時立法，楊釗直言對商界影響好大，比最低工資複雜得多，並非一、兩個月傾得掂，佢話會支持大家討論事件，但應以社會利益為依歸。卓妮同場亦同David傾過偈，發現原來佢好追得上潮流，佢自爆近日愛上網「淘寶」，因為佢身兼多間大學校董，經常接觸大學生，所以知道有呢樣嘢，於是研究埋一份。佢話最鍾意「淘」書籍同家居擺設，就連電子書都有得「淘」。
卓妮之後喺另一個新春酒會又見到港協暨奧委會會長霍震霆兒子霍啟剛同霍啟山，與「跳水公主」郭晶晶結婚只有數月嘅啟剛，今個農曆新年首次派利是，佢就笑笑口話：「最緊要大家開開心心！」