香港勝在有ICAC，香港勝在有你同ICAC，香港勝在一直有你同ICAC，廉署嘅宣傳口號係就係咁講嘞，之不過有幾「勝」先？就以過氣特首曾蔭權為例吖，涉嫌貪污腐敗調查咗咁耐啦，查來查去乜嘢具體行動都冇，何勝之有呀！
唔經唔覺，貪曾醜聞東窗事發已經一周年，東方報業集團一年前連環獨家踢爆曾爵士貪遍海陸空至今，照道理講乜都查得水落石出啦。之但係好可惜，廉署唔知係效率九流慢過烏龜，定係故意高高舉起輕輕放低，事隔一年居然毫無寸進。喂，一年三百六十五日流流長，人哋身懷六甲仔都生得啦，點解廉署蛋都唔屙一隻呀？難怪外界有一個傳言，前任廉政專員湯顯明同曾蔭權老友鬼鬼，ICAC早就決定將呢一件事不了了之軟着陸。簡單咁講，拖得就拖，拖完再拖，拖無可拖都要拖，拖到全人類忘記咗世界上曾經存在過一個舔盡便宜嘅香港第一貪官。
計功夫茶話齋，香港勝在有人不健忘。好似有一位姓莊嘅小市民咁吖，佢冇忘記曾蔭權，亦都冇忘記湯顯明，尋日下午大約兩點鐘去到北角廉政公署總部，一次過舉報兩人嚴重衝擊香港廉潔奉公嘅核心價值。莊先生表示，根據海事處早前畀佢嘅回覆，得悉貪曾去年乘坐星島報業集團主席何柱國嘅遊艇之後，聲稱繳付五百元費用只係一派謊言，認為曾蔭權當時貴為特首，免費接受富豪款待乘坐遊艇有收受利益之嫌。為咗保全香港係全球最廉潔城市之一嘅美譽，莊先生必須挺身而出。
家陣嘅廉政專員係白韞六，功夫茶想問一問白專員，幾時先至將貪曾繩之於法呀？若然真係官官相衞，怕唔怕再有小市民舉報閣下包庇縱容呀？萬一白韞六其身不正，廉署又會唔會深入調查呀？
貪曾是否行為不當其實畫公仔都唔使畫出腸啦，否則京老爺都唔會劃清界線。最新一屆全國政協委員名單之中，曾蔭權爵士名落孫山。意思即係話，貪曾唔可能透過政協階梯出任全國政協副主席，唔可以好似另一位過氣特首董建華咁樣躋身國家領導人之列。雖然係咁啫，不過湯顯明都係政協委員喎，而且政協之中貪官、奸商、蠱惑仔、癮君子乜都齊，踢走曾蔭權始終唔會令政協洗脫藏污納垢嘅形象。
計功夫茶話齋，既然湯顯明都被市民舉報涉嫌包庇老友，唔該白韞六醒醒定定，唔好再辜負港人同胞嘅合理期望。廉潔奉公作為香港嘅核心價值，破壞容易建設難，若然港產包青天居然以謊言掩飾謊言，任由貪曾逍遙法外，繼而產生你貪我貪個個貪嘅漣漪效應，香港將會墮落到萬劫不復o架！