股市舊年升勢勁，但係我哋收到風，話前中總立法會議員黃宜弘喺上屆立法會會期嘅某一日，曾經同民主黨李永達開咗個賭局，話睇淡恒指走勢，認為個市會跌到一萬五千點，如果輸咗就請對方食餐飯。結果黃宜弘輸了棚牙、輸了餐飯，最慘係錯失入市良機，真係三輸。
究竟點解黃宜弘當初會睇淡個市呢？黃宜弘回應話，當時係有「專業人士」分析畀佢聽，佢仲信到十足十，依家真係跌到一地眼鏡碎。
黃宜弘亦牙齒當金使，請咗李永達、單仲偕等成圍枱開酒局，飲咗成兩、三斤靚茅台。佢至今諗番起亦嘆謂，「輸咗餐飯就事小啫，因為信錯咗佢而冇入貨，嗰吓損失就大咯！」唔知佢口中嘅嗰位「專業人士」，憑乜嘢作出呢個判斷，搞到黃宜弘損失咁慘重呢？