新年流流唔少政商界人士都會放低工作、去旅行放鬆下，不過全國人大常委范徐麗泰就反而忙到一頭煙，因為要裝修所以要執屋，唔執猶自可，一執就要面對十年間暴肥四十幾磅嘅現實。
范太尋日出席八和會館春茗，平時都幾健談嘅范太尋日就好靜咁坐咗喺度，原來佢之前執屋執到感冒，所以呢兩日就要休養多啲。范太話畀我哋知，佢屋企之前大裝修，所以就搬咗去第二度住咗五個月，今個月初先至搬返屋企。由於傢俬、雜物太多，范太執屋執咗十幾日，直至前日先搞掂。唔知係咪太過操勞，范太喺春節期間就大感冒，搞到要留喺屋企休息。
唔少女士屋企啲衫都多到一籮籮，原來范太都唔例外，今次大執屋佢就順便整理埋自己啲衫褲鞋襪。佢仲無喇喇自爆自己由十年前重一百一十磅增至依家一百五十六磅，好多衫都唔啱着，所以惟有忍痛割愛，送去慈善機構咁話。
