政情：廢腑之言：馮檢基傾普選「冇底線」

每個人心裏面對某啲原則都有條底線，但曾經兩度進入中聯辦，就政改談判嘅民協立法會議員馮檢基（KK），對二○一七年普選特首原則竟然「冇底線」。KK尋日同黨友譚國僑出席新春團拜，提起泛民主派多年嚟都因為各自嘅原則問題互不咬弦，而錯失好多合作機會，亦令建制派有機可乘。KK於是豪言民協將會放下一切普選原則，希望所有泛民政黨喺冇任何先決條件下坐低慢慢傾，唔好抱「非我政黨不可」嘅心態爭取普選咁話。不過，KK呢招根本係新瓶舊酒，皆因民協向來被泛民視為左右逢源嘅「騎牆派」，今次嘅「冇底線」言論同昔日主張嘅「又傾又砌」有咩分別？