政情：劉江華夫婦 為愛犬搬入新界
問責官員嘅僭建問題再次被窮追猛打，不過，身為政制及內地事務局副局長劉江華嘅太座，即係廉政公署社區關係處「一姐」穆斐文就話冇有怕，事關佢兩公婆依家住緊嘅馬鞍山豪宅帝琴灣係租嘅，所以唔會花錢去僭建，而且管理公司對住戶嘅要求都好嚴。
劉太忙籌備貪官劇集
咁點解要搬去新界住？咪為咗隻愛犬囉，劉太話，依家全香港大部分私人樓都唔畀養狗，佢同老公又唔想住村屋，搵咗好多地方，終於搵到依家住緊嘅屋苑可以養狗，等佢哋養嗰隻魔天使有個安樂窩！
劉太又同我哋講，話最近都好忙，皆因出年就係廉署成立四十周年，依家正籌備拍攝電視劇集《廉政行動2014》。
據知，到時每集會由以前四十五分鐘加長至九十分鐘，真實個案則包括五個範疇，其中有一輯係政府高官嘅貪污案，呢個高官大約係六、七年前定罪，睇嚟睇去，係得房屋署前高官陳裘大最接近。不過，如果係拍攝關於「貪曾」嘅故事，收視率肯定大大提高啦。
劉太忙於籌備拍劇，劉副局長都一樣咁忙碌，佢即將會代表港府出差，前往日內瓦出席國際人權公約聽證會。