政情：「百無」長毛 舌戰馬恩國
社民連梁國雄尋日再次喺立法會舌戰民建聯，不過今次對象係「男版蔣麗芸」馬恩國。話說馬恩國尋日喺立法會政制委員會發言，無申報係民建聯黨員，又無申報係政協，被長毛踢爆後即扯火，以連環新加坡式英文話自己係愛國者、有大學學位、係大律師資格，但長毛乜都無，無資格批評佢。
被寸無大學學位
馬恩國尋日以香港專業人士協會副主席身份發言，被長毛話踢爆無申報利益後即時上身，話自己雖然做山西省政協，但又係澳洲大律師，仲用英文話自己有大學學位，但長毛無。
跟住長毛再次踢爆佢應徵副局長失敗，馬恩國就繼續用新加坡式英語去反駁長毛，話自己「I got the potential，you don't」（我有潛質，你無），長毛再插佢點解一個律師可以咁講嘢，點知對方回敬佢一句「我唔係律師，我係大律師！」就係呢一句，當場有唔少人都笑咗。講到愛國，馬恩國用英文話長毛唔係中國人，當中仲夾雜咗粗口字。兩人用英文互罵五分鐘，最慘係身為委員會主席嘅譚耀宗唔能夠趕呢位黨友離場，只能叫佢收聲。
馬恩國唔好忘記，民記陳鑑林同梁志祥兩位立法會議員都無大學學位，唔通佢想退黨？