政情：白鴿賣總部 想甩難冇咁易

前立法會議員李華明（肥仔明）尋日同傳媒拜年時透露，白鴿黨決定賣咗間是非屋，喺同一地段改買一個面積大一倍嘅單位作為黨總部。查實該黨黨團召集人單仲偕兩年前都提過要賣咗間總部，改買一間大啲嘅寫字樓，但礙於當時唔少黨友認為白鴿黨應該留番啲錢去選區議會加立法會，所以最後都冇成事。呢兩年樓價飛漲，白鴿黨換樓都失晒時機啦，學肥仔明話齋，同區現時一個四千幾呎嘅單位要成三千幾四千萬咁多，恒利總部現時巿值差唔多有二千萬，賣咗舊單位後應該夠錢畀新單位首期。

萎縮緊仲想搬大屋

但白鴿黨仲有好多疑團未解喎，根據土地註冊處資料，恒利總部一早喺九九年「供滿」，白鴿黨根本就唔使再交租，咁究竟咁多年嚟交租嘅錢去晒邊？到底有冇人中飽私囊？喺輿論壓力下，何俊仁同李永達終於公開最初持有間樓嘅神秘人身份，佢就係非白鴿黨黨員嘅商人于品海，不過佢哋就拒絕詳細交代于品海嘅持股量及其他股東身份，成件事仲係唔清唔楚。想甩身，都要解晒啲疑團至得o架！

不過話時話，白鴿黨打算細屋搬大屋，但係成個黨都喺度萎縮緊，要咁大個地方養老鼠咩？

白鴿黨未解疑團

‧SOUND FACTOR咁多年租金收入有幾多﹖

‧咁多年嚟租金嘅錢去咗邊？

‧商人于品海持股量有幾多﹖

‧除于品海之外，相關公司有幾多股東﹖佢哋係咩人﹖持股量有幾多﹖

‧有專家話將總部業權由SOUND FACTOR轉歸白鴿黨手續其實好簡單，點解白鴿黨唔咁做﹖

‧何俊仁話自己冇收過股息或袍金，有咩憑據﹖