中環出更：陳智思開畫展 臨急亂點

行政會議成員陳智思（Bernard）「從政而優則畫」，仲聯同母親陳沈時芬及姪女舉辦自家出品嘅「陳氏三代藝術展」，卓妮梗係唔會放過機會去現場湊下熱鬧啦。畫展開幕禮冠蓋雲集，陳氏一家成功請到粒粒政壇巨星撐場，可謂星光熠熠耀智思，絕非一般畫展開幕禮可以比擬。
陳智思以塗改液創作名為《國民教育》嘅點畫，至於腦袋係咪已經被「洗」就要觀眾自行領會。
陳智思以塗改液創作名為《國民教育》嘅點畫，至於腦袋係咪已經被「洗」就要觀眾自行領會。

Bernard喺今次畫展「戲份」唔多，始終陳老太習畫四十幾年，畫展當然由陳老太擔大旗。百足咁多爪嘅Bernard唔知係咪無暇分身，九幅自創塗改液點畫新作似乎都係「臨急抱佛腳」而成，連Bernard都直言不諱得四個月時間籌備。

《舊政總西座》硬繃繃

平時唔開畫展，Bernard都唔願拎起塗改液創作點畫，唔怪得喺毫無靈感下，惟有點幅喺佢時任古物諮詢委員會主席時，掀起評級風波嘅《舊政府總部西座》，Bernard睇見自己幅「劣作」都眼冤，話寧願收倉都唔想拎出嚟參展喎。

陳有慶、沈時芬（前排左、右）一家喺沈時芬嘅作品前留影，沈時芬後面係陳智思，陳有慶後面係陳智思兄長陳智文，右一係陳智思姪女陳曉玲。（徐家浩攝）
  • 陳有慶、沈時芬（前排左、右）一家喺沈時芬嘅作品前留影，沈時芬後面係陳智思，陳有慶後面係陳智思兄長陳智文，右一係陳智思姪女陳曉玲。（徐家浩攝）
中聯辦主任張曉明（中）出席開幕禮，陳有慶夫婦親自接待。
  • 中聯辦主任張曉明（中）出席開幕禮，陳有慶夫婦親自接待。

問到佢嘅得意之作，就要數代表佢泰國老鄉嘅《大象》喇，Bernard鍾意幅畫抽象得嚟亦唔難認出畫中主角，唔似得《舊政總西座》嗰幅咁硬繃繃喎。同場現身嘅仲有Bernard嘅九歲細仔銘宇（Bradley），佢仲帶咗兩幅分別描繪公雞同魚嘅得意之作參展。問到爹哋從政會唔會少咗時間陪佢，Bradley笑言爹哋會抽時間陪佢同哥哥行山、玩大富翁，力撐Bernard呢位好爸爸。但對於爹哋參選特首，Bradley就只係識得答「唔知」。

卓妮