年，又過年，共慶歡樂年年，齊賀各位工商生意紛紛發展！
蛇，又再蛇，共慶偷懶全年……咦咦咦，唱錯咗，雖然今年歲次癸巳生肖屬蛇，都唔應該叫人蛇王偷懶嘅。賀年歌仔都有得唱啦，賣懶，賣懶，賣到年三十晚。
之不過咁，蛇王偷懶呢家嘢係人類渣滓階層嘅劣根性之一，即使冇人開聲教路，好多人都會經常咁做，例如出晒名盛產懶蟲嘅政府部門。你知啦，積重難返嘅官場老規矩係返工等收工，收工等出糧，出糧等升職，等下等下再升下升下隨時好似曾蔭權咁做埋特首，跟住就可以上下其手，確係幾鬼過癮o架，只不過納稅人眼冤咁解啫。
今日功夫茶同大家講另一個官場偷懶故事，主人翁係民政事務總署轄下嘅牌照事務處，日常職責包括旅館、床位寓所以及卡拉OK等等場所嘅發牌事宜。該處前線督察義字當頭幫理不幫親，睇見部門之內亂七八糟，眼火爆一嘢越級投訴，直接向特首辦爆大鑊，數臭部門主管六宗罪。
牌照事務處六宗罪到底係乜乜東東呢？一，上級包庇下屬；二，冇做好病假管理；三，人事安排失當；四，強迫員工交數；五，嚴重違反檢控政策及常規；六，違反調查守則。
先講第一宗罪嘅上級包庇下屬吖，原來件事係咁嘅，投訴者指名道姓，有牌照事務督察當值期間擅離職守走去深圳尋歡，上級其實係知情嘅，不過冇適當處理啫。簡單咁講，有人蛇王偷懶北上玩樂，有人唔知點解裝聾扮啞。大家留意喎，呢單畸屎唔係蛇年發生嘅蛇王事件，投訴時間係二○一一年。功夫茶以君子之心度小人之腹，過去兩年期間唔知幾多蛇王出洞，擅離職守尋歡作樂咯！
至於何謂冇做好病假管理呢？其實好容易理解啫，有人經常放假唔返工，唔理佢係詐肚痛定係真有病，總之冇人認真看待，職位依舊，人工照逗。嚴格而言，唔止放假嗰個懷疑蛇王，負責管理嗰個都涉嫌偷懶。
之所以搞到前線督察咁眼火爆，導火線係強迫員工交數，即係俗稱嘅篤數。牌照事務處竟然要求，每人每年必須交出二百五十宗檢控，比前一年增加兩成半。喂，大佬呀，有人犯法就話執法啫，若然太平盛世個個奉公守法，硬性規定交數咪等於老屈良民？容乜易造成大量冤假錯案呀！人哋嘅職位係前線督察，唔係前線篤數！
功夫茶問問大家，若然牌照事務處有人偷懶冇人處理，身為老頂嘅民政事務總署又算唔算偷懶呢？當然算啦，否則人哋都唔使越級投訴驚動特首辦啦。總而言之，未到蛇年已蛇王，官場偷懶爭稱王，確係唔眼火爆就假！