大年初二，恭喜發財，繼續恭喜大家都發財！
新春佳節除咗恭喜發財之外，功夫茶其實最鍾意聽到龍馬精神同埋身體健康。無他嘅，健康就係財富吖嘛，萬一大吉利是病魔纏身趕極都唔走，即使有億萬身家都無福消受啦。所以咯喎，今日要同大家講一個古仔，一個最適合新春佳節講嘅開心古仔。
未講古仔之前，不如先點一首歌仔畀大家聽吖，呢首歌就係叫做《身體健康》：我只想，身體健康，我害怕你要照顧我擔心得出一臉倦容，而我病床中反悔內疚，令你太心痛。我只想，身體健康，要活到過百歲不需拐杖都可跟你相擁，不忍你勞碌的照料我，受了這種切膚之痛。
好嘞，古仔嘅女主角係李太何慧兒，現年四十八歲嘅佢○六年由於手震求診而得知患上罕見嘅遺傳性心肌衰竭，必須安裝心臟除顫器並且接受治療。去到舊年九月病情惡化，入院接駁外置心室輔助裝置先至可以維持心臟功能。有乜嘢辦法解救李太嘅燃眉之急呢？點樣先至有機會令到照顧太太嘅李先生唔再「擔心得出一臉倦容」？辦法係心臟移植。
問題係，適合移植嘅心臟唔係一時三刻話有就有，李太苦苦等咗三個月都無法如願以償。眼見有人生命危在旦夕，為民請命嘅東方報業集團自然義不容辭大聲疾呼，上月二十五日《東方日報》同《太陽報》報道李太嘅情況，希望善心人士能夠樂善好施。果然皇天不負有心人，報道一出街，李太隨即得到一位去世者捐出心臟，然後成功移植，康復情況理想。
手術後歡度第一個農曆新年，李氏一家四口手拖手喺醫院嘅隔離病房團年，感激捐贈者無私奉獻。受盡切膚之痛嘅李先生就話嘞，李家今後會團結一致戰勝病魔：「我哋已經有一條好粗嘅救生繩，只要捉緊啲爬上去就得，爸爸會企喺山頂同你哋打氣！」
至於女主角本人，原本氣若游絲又骨瘦如柴嘅佢，家陣已經可以聲如洪鐘透過電話同阿仔溝通：「畀心機啲啦！讀書要上心！」
大家話嘞，呢個古仔係咪好開心？無私奉獻嘅善心人士係咪好值得表揚？適逢今年係蛇年，簡直係名副其實嘅蛇來運到。唔講大家可能冇留意，蛇係醫學同藥劑界嘅圖騰，而且對於古埃及同古中國而言都係吉祥物，原因係蛇會脫皮蛻變，畀人一種歷劫重生嘅感覺。而且事實上，毒蛇嘅毒液可以製成救人嘅靈藥。
正所謂生命影響生命，接受過心臟捐贈嘅李太表示，將會用心待人回饋社會。計功夫茶話齋，大家不妨認真考慮器官捐贈，反正萬般帶不走，不如遺愛在人間！