龍去蛇來，聽日就係大年初一，大家新年有乜節目呀？嗱，拜年、逗利是、睇煙花，呢啲例牌活動梗唔少得啦，除此之外，功夫茶建議大家，不妨去欣賞舞龍舞獅。
原因有二，一來舞龍舞獅為節日增添喜氣，寓意龍精虎猛，可以討個吉祥好兆頭。二來咯喎，由於欠缺政府支援，任由呢項傳統國粹自生自滅，話唔定有日會失傳，今日唔睇，以後可能冇機會睇喇。
功夫茶唔係杞人憂天，你知啦，武林高手最怕無用武之地，而舞林高手最怕無練舞之地，偏偏本港舞龍舞獅團體就面對呢種困境。嗱，就算係多次代表香港揚威國際賽嘅龍獅隊，一樣好難搵到正規嘅練習場地，就算喺公園、天台、村地練習，亦經常遭到地政總署清場，唔係投訴阻街，就係投訴噪音，龍獅隊轉場仲密過跳梅花樁，咁又點大展拳腳吖？
官地唔得，租運動場又得唔得呀？得唔係唔得，不過政府提供嘅所謂場館，唔係籃球場成日爆滿租唔到，就係舞蹈室樓底太矮唔適宜練習龍獅，加上租場同搬運費用不菲，經濟上亦難以負擔。所以咯喎，有業界六年來一直屈身油麻地天橋底下「練舞」，隊員要以拍手代替鳴鼓，講起都辛酸呀！
唉，淺水困蛟龍，業界指場地問題窒礙龍獅運動發展，十年前香港有二、三十隊獅隊參加跳樁賽事，依家剩番一半。你話嘞，咁搞法，龍獅隊係咪買少見少吖？舞龍舞獅係咪有可能失傳吖？
今時今日，傳統文化已經買少見少o架嘞，唔該官老爺着緊啲啦。舞龍舞獅除咗係新年必備節目、華人習俗，更加係傳統國粹、文化遺產，萬一因為政府支援不足而式微失傳，市民又少一分集體回憶，港產官僚賠唔賠得起呀？更何況，舞龍舞獅仲係獲得亞奧理事會承認嘅運動項目添，難得香港藏龍臥虎，港府居然唔識寶，係咪愚不可及呀？
講到尾，港府話重視文化保育，根本就係葉公好龍，龍獅國粹就在眼前，偏偏唔去珍惜，唔去發展，平時講到天花龍鳳都無用啦。台上一分鐘，台下十年功，練習龍獅係咁，文化保育都係咁，無話一蹴即就o架，係要細水長流，當局對龍獅傳統支援不足，一項文化遺產就慢慢消失o架嘞。
蛇年到，港產官僚唔好再死蛇爛鱔嘞，快啲諗辦法為龍獅業界提供練習場地啦，今屆政府上場半年幾，風雨不斷，諸事不順，如果能夠振興龍獅業，令呢項國粹發揚光大，生氣勃勃，咪當沖喜囉。嗱，你哋都想喜氣洋洋過新年o架！