政情：「惜食」黃錦星 嘗街市賣剩菜
唔少市民都會喺今晚食餐豐富嘅團年飯，環境局局長黃錦星（KS）尋日就率先同一班「惜食香港督導委員會」成員一齊品嘗街市賣剩嘅菜，實踐低碳環保團年。呢餐團年飯五餸一湯，有南乳炆蓮藕、煎豆腐、小棠菜炆冬菇、糙米飯，仲有紅豆糕、蘿蔔糕做甜品，雖然清一色係齋菜，但KS似乎食得好滋味咁款，仲向大廚阿姐偷師，話過年要親自下廚煮番幾味齋菜喎。
KS話，市民新年唔一定要大魚大肉，多菜少肉仲健康。原來佢平時都有下廚，今日年廿九就準備煮魚翅……瓜！局長玩幽默慢慢講「魚翅瓜」，如果聽少個字，就以為佢做局長都竟然教人食魚翅咁唔環保。其實餐團年飯喺職工盟位於大埔太和嘅培訓中心開餐，間中心除咗培訓學員，仲有個叫「食德好」嘅環保計劃，專門喺大埔、元朗嘅街市回收檔販賣剩唔要嘅蔬菜瓜果，呢啲下欄菜會送去社福機構，又會用嚟煮畀中心學員食。