政情：阿Ann出晒位 鼠王芬話似小一生
西九新動力梁美芬（鼠王芬）喺上屆立法會發表過唔少惹火言論，但今屆連任後發言用字就溫和咗好多，反而講嘢似阿媽教仔嘅民建聯新丁蔣麗芸（Ann）就火速走紅。點知鼠王芬就話一啲都唔介意被人搶風頭，事關佢已經做過一屆議員，依家好似睇番小學生一年班咁話。莫非佢想話自己升咗呢，暗踩阿Ann仲係小學雞一年班呢？
鼠王芬一向言論出位，淨係「懲罰選民論」都辣慶唔少人，但今屆佢就好似收斂咗好多。佢就解釋話，自己已經做咗一屆議員，好多嘢都有經驗，知道要點處理。
至於驚唔驚被頻頻曝光嘅阿Ann搶晒風頭，鼠王芬就話新丁通常都會係大家關注嘅焦點，依家大家轉移視線去阿Ann度，佢反而可以專注做多好多嘢喎。
讚兩個「偉」人表現好
喺政圈知己知彼好緊要，咁啲九龍西街坊又點睇阿Ann呢？鼠王芬就話：「個市場好大嘅。」大家都有唔同支持者喎。鼠王芬又話，今屆咁多新丁之中以工聯會郭偉強同白鴿黨胡志偉表現最好，兩個發言都算唔錯，其中郭偉強仲夠晒勤力，好多唔跟開嘅議題都好快上手喎。