政情：國術館主 挑戰社民連

自稱國術團體嘅「東方體育會」館主連同幾位教練，帶齊大鼓現身維園正門大耍中國拳術，從南拳到自創嘅宇宙拳均拳拳到肉，充滿殺氣，其中兩位明星教練更曾參與電台節目《功夫傳奇》拍攝，吸引一班行年宵嘅市民駐足圍觀，但大家愈睇愈感到一頭霧水，究竟年廿八做咩當街耍拳兼派傳單呢？

自稱身家十幾廿億

喺現場大耍自創宇宙拳嘅東方體育會館主、富士通香港總代理新暉電腦主席苗祺鈺解釋，佢哋係睇唔過眼社民連立法會議員梁國雄（長毛）等人，成日喺莊嚴嘅立法會掃枱、掟嘢、發爛渣，希望藉耍拳去聲討呢班為反而反、惟恐天下不亂嘅刁民！聽落似同支持特首梁振英嘅團體差唔多，即惹來收錢耍拳嘅猜測。

會館教練輪流表演中國拳術，聲言要替天行道、儆惡懲奸。

苗祺鈺自稱坐擁十幾廿億身家，豪言唔使收人三百蚊遊行。（陸智豪攝）

苗祺鈺即時無名火起，自稱坐擁十幾廿億身家，連體育會嘅教練都坐底月賺兩、三萬元，豪言「唔使收人三百蚊遊行囉！」佢更澄清會館絕對獨立、無黨派，反指泛民主派政黨「賊喊捉賊」，直言佢哋受外國勢力操控，發起遊行示威荼毒年輕人「以為香港就快玩完」，形容佢哋運用兵法中「亂其心、喪其志」招式，令港人自亂陣腳。

「唔係個個都反中國」

苗祺鈺話，佢不滿部分挺梁團體嘅「挺梁」聲勢唔夠激，「太溫和，外人唔係好知佢哋做咩」，所以佢先忽發奇想，藉耍拳宣揚強身健體嘅重要性，畀其他人知道「唔係個個都反中國」咁話。究竟耍拳同愛港愛國概念有咩關係，真係難明，但佢哋揚言若果反中亂港行為持續，只會迫使佢出手替天行道、儆惡懲奸！