中環出更：許曉暉探鴨寮街市道
市民呢幾日都忙於辦年貨，連民政事務局副局長許曉暉（Florence）都唔例外。卓妮尋日就喺深水埗鴨寮街撞到Florence，身旁仲有深水埗民政專員莫君虞，原來兩人「行孖咇」到鴨寮街一帶了解市道。現場好多攤檔都放咗好多極富新年氣氛嘅商品，好似賀年衣服、擺設等一應俱全，Florence行行吓索性睇吓有乜需要買，最後喺間小商舖買咗張「龍馬精神」嘅揮春應節，希望蛇年個個人都精神奕奕。
支持社企產品
Florence突然微服私訪深水埗，相信事前冇乜人會估到，但熟悉佢嘅人都知道，Florence好支持社會企業產品，好似去年農曆新年同中秋節，佢都係以社企產品來送禮，所以有人估佢年近歲晚到深水埗為小商舖東主打打氣絕對唔出奇。講開新年送禮，唔知Florence今年係咪都係鎖定社企出品作送禮之用呢？