中環出更：趙樓神：投資要學蛇
外號「K金大王」嘅珠寶行總裁胡楚南日前提早搞春茗，一如既往請咗「趙樓神」長實執行董事趙國雄出席，卓妮當然要捉住佢幫樓市把把脈啦。趙樓神坦言，世界上冇一樣嘢會永遠上升，現屆政府應市民所急，已經用盡最大努力增加土地儲備及住屋供應，預料樓市再大幅飆升嘅機會唔會太大。
趙樓神繼續妙論蛇年經濟，佢話蛇嘅特性係好靈活，建議大家有合適嘅投資機會，就要睇準時機出擊。不過，佢話蛇嘅另一個特性係會冬眠，叫大家見到有乜唔妥嘅話，就要學蛇咁靜止不動，忍忍手等待機會再出擊喎。
胡家與舞者有緣
好多市民都希望政府喺嚟緊財政預算案中再派錢，趙樓神就話，自己本來好反對政府咁做，但依家就改觀咗。話說佢一班移居美加嘅朋友將返港度歲，原來回港嘅主因係要領取政府之前派嘅六千蚊。呢六千蚊造就咗佢同老友敍舊嘅機會，而老友留港期間嘅使費肯定多過六千蚊，間接刺激經濟，所以政府再派錢，都不失為好事喎。
當晚胡楚南新抱、珠寶行董事總經理王凱曼（Carmen）穿上黑色露肩晚裝，手上嘅巨型嫣紅色碧璽戒指好搶鏡。佢話，當年慈禧太后都鍾情呢種寶石，價錢比紅寶石平一截，鮮艷顏色又切合中國人愛喜慶嘅傳統，故深受唔少內地客青睞。大仔胡智偉就孖住女友Ceci現身，原來Ceci同Carmen一樣都係跳舞出身，胡家同舞蹈認真有緣。
卓妮