玻璃樽係一種好偉大嘅發明，同時亦係一種好可悲嘅廢物。玻璃樽作為盛載液體嘅容器，生產飲品嘅過程當然必不可少，問題係飲品消耗完之後點算好呢？雖然有人用玻璃樽插花，甚至有人塞張字條落去掟出海面，祈求唔知天涯定係海角有個異性陌生人執到，然後共同譜出一曲「玻璃樽的愛」，不過始終仲有大量廢物要棄置同處理。
冇耐之前，環保促進會公布「香港國際海岸清潔運動2012」結果，玻璃碎片以一萬六千幾件、比重佔兩成三排首位，成為海洋垃圾之王。環保促進會就話嘞，有必要教育市民海洋垃圾對環境造成嘅破壞，鼓勵市民將廢物循環再用，並且積極推廣玻璃回收計劃。
民間團體發出回收玻璃嘅呼籲，官老爺有乜嘢反應呢？好咯好咯，天有眼咯，港產官僚唔再麻木不仁，終於肯認真考慮將玻璃廢物循環再用。大家都知啦，香港嘅環保工作乏善足陳，好大程度同特區政府嘅拉牛上樹作風有關。就好似前特首曾蔭權爵士咁吖，除咗貪盡大小便宜之外乜都唔識又乜都唔做，所以有個響噹噹嘅花名「氣候逃犯」。
環境局推出《飲品玻璃樽生產者責任計劃》諮詢文件，展開為期三個月嘅諮詢，建議向所有玻璃樽飲品供應商徵收費用，作為支付承辦商回收玻璃樽廢物之用。環境局局長黃錦星話喎，現時玻璃樽佔堆填區廢物大約百分之三，而玻璃樽屬於可回收物料，本港三分之二玻璃樽盛載飲品，其中百分之八十五係酒精類飲品玻璃樽。政府建議透過承辦商招標回收玻璃樽，由於玻璃物料較重，所以必須徵收回收費用，七百五十毫升紅酒樽嘅回收費大概七毫子，所以一公升玻璃樽約略收費一元。回收之後嘅玻璃樽可以點樣循環再用呢？製成環保磚鋪路或者當作其他建築物料囉，實用性幾高㗎。
即係咁，功夫茶絕對唔反對回收玻璃樽，向玻璃樽飲品供應商徵收費用，而唔係直接打小市民荷包，理論上唔算太擾民。之但係咁喎，羊毛出自羊身上，玻璃樽徵費最後又係消費者埋單嘅咋。仲有，具體回收辦法係點樣呀？官老爺會唔會提供足夠嘅玻璃樽回收箱呀？功夫茶身邊唔少熱愛環保嘅朋友，平時遇到最頭痛嘅問題係唔知將玻璃樽送去邊度回收，如果黃錦星只係識得一味收錢，完全冇交出實際回收嘅辦法，相信全人類都會覺得被搵笨。
仲有另外一個問題喎，點樣防止有人將玻璃樽掟入非玻璃類垃圾桶呀？若然政府收咗錢之後仍然有大量玻璃樽送去堆填區，不勝負荷嘅地球先生有可能講粗口囉。
總而言之，唔睇通勝都知宜忌，回收玻璃係啱嘅，不得其法就錯晒！