中華廠商聯合會新一屆會董上任逾一年，如無意外要到一四年底先至換屆，雖然距離換屆仲有兩年時間，但據聞廠商會入面已就下屆會長人選議論紛紛。有傳話現任第一副會長陳淑玲（Shirley）會做下屆會長，但亦有人話第二副會長李秀恒或副會長顏吳餘英都有機會競逐會長寶座，但最後會否有其他人殺出嚟接施榮懷做會長呢？會內人士就話，仲有時間，傾吓先啦！
據了解，廠商會會章訂明每位副會長只可最多連任三屆，所以做過四屆副會長嘅人選，一係要升呢競逐會長，否則就要退出或留喺會董會就算。聽聞喺明年做滿四屆副會長嘅人選只有李秀恒同顏太，但有熟悉廠商會嘅人透露，兩人之中以李秀恒應該會被看高一線。至於另一大熱就係Shirley喇，因為佢依家已經係第一副會長兼香港品牌發展局主席，所以如果要升呢嘅話，佢係最有可能嘅人選喎。