嗱，都話《好報》有料到o架啦，可以講係春江水暖鴨先知，快人一步消息送到。去年十二月十四日，隨《太陽報》免費派發嘅《好報》獨家披露驚人內幕，北大人眼見澳門回歸祖國之後變咗超級洗錢機，清洗黑錢金額係天文數字嘅超過十萬億港元，中央派出欽差大臣南下調查。呢一單咁猛料嘅內幕消息最近出現後續性發展，草木皆兵之下嚇到唔少國產貪官三魂唔見咗七魄。
即係咁，內地嘅肅貪風潮一浪接一浪，大江東去浪淘盡，千古風流人物，不過係有咁耐風流、有咁耐折墮嗰隻。英國《泰晤士報》引述熟悉澳門賭業嘅人士透露，未來幾星期會有更大規模嘅打擊行動，好多俗稱疊碼仔嘅博彩中介人已收到風聲，農曆新年過後嘅二月下旬，中央最少會向六個城市開刀，特區澳門亦係不可獨善其身嘅整治目標。你知啦，澳門被稱為「黑錢洗衣店」，國內數之不盡嘅貪官污吏利用濠江賭枱，將唔見得光嘅黑錢洗得乾乾淨淨，萬一澳門真係捲入反貪浪潮，唔知幾多個朝中權貴着草都唔得掂。
根據消息指出，內地多個部門包括警方在內會加強反貪力度，澳門方面亦會配合，為中國新一代領導班子揭開肅貪行動嘅序幕。咁嘅風聲一傳出之後，澳門濠賭股尋日應聲逆市下挫。正所謂咯喎，空穴來風，未必無因，欽差大臣南下調查有機會實牙實齒大展拳腳，學似領導人話齋，小蒼蠅同大老虎一齊打！
講到呢度，又係賣花讚花香嘅時候嘞，既然《好報》快人一步消息送到，係咪好值得大家熱烈捧場呀？係咪好應該每逢星期五攞幾份欣賞欣賞呀？功夫茶之所以話係「攞幾份」而唔係「攞一份」，原因非常之咁簡單，好嘢當然要同人分享o架啦，大家應該為親朋戚友攞幾份《好報》分甘同味吖嘛。
反貪行動其實唔止空穴來風咁簡單，去年實際上已經有疊碼仔因為洗黑錢而被捕，當中涉及六個接待內地超級賭客嘅疊碼仔。疊碼仔其中一個功能係幫貪官將巨額賄款由內地匯至澳門，屬於洗黑錢關係鏈嘅重要一環，中央如果要雷厲風行反貪防腐，切斷呢一條關係鏈係必不可少o架。
跟住落嚟會係點嘅呢？故事情節將會朝住邊一個方向發展？會唔會好似專家學者咁講，貪官將資產轉移海外甚至流入香港？功夫茶強烈建議大家，密切留意《好報》日後嘅報道，隨時又會有獨家內幕呈現喺各位親愛讀者嘅眼前。
總而言之一句講晒，欲知猛料睇《好報》，唔睇《好報》你走寶！