距離一五年區議會選舉唔夠三年，有意由委任轉直選嘅區議員陸續浮面。
周浩鼎余漢坤浮面
其中兩人分別係離島委任區議員周浩鼎同余漢坤，其中後者係鄉議局主席劉皇發嘅女婿，早前佢已聯同同區區議員開設聯合辦事處，因此有人估計佢係想為轉戰直選鋪路。此外，曾於○三年落敗區選嘅西貢委任區議員陳博智，聽聞事隔十年後亦蠢蠢欲動再戰直選。
不過，話說回頭，回歸以來由委任轉直選嘅區議員都唔多，就以前年區議會選舉為例，當年以委任入議會嘅觀塘區議會主席陳振彬、深水埗區議員陳鏡秋等齊齊轉直選，已經算係歷年來較多人嘅一次，所以有人事先吹淡風，話唔好期待來屆區議會有太多委任議員會轉戰直選喎。