中華廠商聯合會永遠名譽會長黃友嘉（左）同觀塘區議會主席陳振彬（右），新當選為今屆港區全國人大代表，廠商會屬下一個委員會前晚搞咗個私人派對，邀請兩人同新任政協委員嘅廠商會會長施榮懷及一班會友齊齊玩番晚。主人家別出心裁搵咗兩件「黃袍」畀兩位人大「加身」，慶祝佢哋當選，二人睇嚟相當受落，換上「黃袍」後交足戲，雙手翹向後扮皇上。自古以來每朝只有一個皇帝，呢個「兩皇並列」嘅情景真係難得一見喇。
（受訪者提供）
