政情：囡囡誕龍鳳胎發叔關心治安
新界鄉議局主席劉皇發嘅囡囡兼時裝設計師劉玉蓮（Virginia），同信和集團總經理余漢坤婚後甜蜜蜜，最近佢哋成功追到一對龍鳳胎，孖B已經三個月，加埋已經六歲嘅大仔，今年過年一家五口夠晒熱鬧。發叔最近身體抱恙，經充分休息後復出冇耐，希望添孖孫可以幫佢沖吓喜啦！
Virginia話，原本佢就諗住要生夠三個，依家一次過生咗孖胎，掂晒。佢又話，大仔名叫一言，孖胎分別叫一行、一心，三個子女湊夠「言行一心」，寓意深遠。自從大仔出世後，Virginia已減少接騷做嘢，依家突然多咗兩名子女，更加要以家庭為重。
唔上網靠睇報紙知時事
子孫滿堂嘅發叔，唔知係咪將心比己，睇到社會危機處處，預早為劉家後代嘅安全發聲。尋日佢喺立法會提出口頭質詢，關注女性網上交友受騙及性侵犯案件猖狂，要求政府正視。發叔呢個質詢認真夠潮，事關佢平時唔上網，又點知網上犯罪猖獗？發叔話，訊息係睇報紙知o架！