政情：阿茂換眼鏡 開口夾着脷

阿Paul忽然由戴開嘅金絲幼框眼鏡，不約而同與太太一齊轉口味戴深色粗框眼鏡，佢解釋話，因為雙眼嘅近視度數深咗，又話新眼鏡鏡框闊過以前，可以令佢睇嘢「闊啲」，其他人睇落又會覺得佢「精神啲」。佢又大讚新眼鏡係香港製造，眼鏡臂可以垂直之餘，仲可以一百八十度扭開，但代價就係要使成一千元，覺得有啲肉赤喎。

玄學家：心理大於實際

阿Paul突然換眼鏡，莫非想喺蛇年轉番個大運，等自己新一年唔使再頭頭碰着黑？阿Paul聽到問題後大笑幾聲，之後就淨係答咗「轉一轉」三個字，聽落似乎意味深長。

咁換眼鏡究竟對轉運到底有冇幫助呢？玄學家楊天命就話，眼鏡對改變一個人嘅運程只係佔好少作用，假如當事人覺得現時運程麻麻，換吓眼鏡只係心理效果大於實際喎。楊師傅補充，屬羊嘅阿Paul龍年犯太歲，蛇年運程會比龍年好，但如果佢真想喺蛇年催谷運程，佢應該着多啲旺佢生肖嘅顏色，咁就可以否極泰來。

講軍營地用途急急補鑊

不過，阿Paul未轉好運前，尋日已被議員陰到，聲言正就九龍塘解放軍軍營土地改成住宅用途方面「做緊工夫」，須知軍事用地問題相當敏感，搞到發展局尋晚要急急澄清補鑊，推翻阿Paul嘅言論，佢今次真係開口夾着脷。

下星期農曆年初五就係一年一度嘅情人節，阿Paul預告已經訂咗餐廳同老婆撐枱腳食燭光晚餐，又透露會向對方送上十一支玫瑰花。佢又教各位男士最緊要學識「三從兩德」，「三從」分別係「太太說話要聽從」、「太太shopping要跟從」同「就算太太做錯都要盲從」，而「兩得」就係一定要記得太太生日同結婚周年紀念日喎！